កាលពីថ្ងៃទី ១៩ ខែកុម្ភៈ ម្សិលមិញនេះ គម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) បានបើកការដ្ឋានសាងសង់ហើយ ក្រោមអធិបតីភាព សម្តេចមហាបវរធិបតី ហ៊ុន ម៉ាណែត, ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ព្រមទាំងគណៈប្រតិភូក្រសួងជាច្រើនរូប។ 

គម្រោងស្ពានឆ្លងកាត់ទន្លេបាសាក់នេះ នឹងតភ្ជាប់ពីសង្កាត់ចាក់អង្រែក្រោម ខណ្ឌមានជ័យ ទៅកាន់សង្កាត់ព្រែកប្រា ខណ្ឌច្បារអំពៅ ប្រវែងសរុប ១៦៥០ម៉ែត្រ (ប្រវែង ៨៤៥,៧០ម៉ែត្រ បូកទាំងផ្លូវតភ្ជាប់ប្រវែង ៨០៤,៣០ម៉ែត្រ)​ មានទទឹង ២៧ម៉ែត្រ ដែលចែកចេញជា ២គន្លងទៅមក សម្រាប់រថយន្ដ, ១គន្លងទៅមក សម្រាប់ទោចក្រយានយន្ត​ និង ១គន្លងទៅមក សម្រាប់អ្នកដំណើរថ្មើរជើង។

គម្រោងស្ពាននេះ ប្រើទុនវិនិយោគក្នុងតម្លៃជាង ៦០ លានដុល្លារ ក្រោមក្របខ័ណ្ឌឥណទានសម្បទានពីរដ្ឋាភិបាល នៃសាធារណរដ្ឋប្រជាមានិតចិន សាងសង់ដោយក្រុមហ៊ុន Shanghai Construction Group និងត្រូវបានកំណត់រយៈពេលសាងសង់ចំនួន ៤២ខែ ដែលមានន័យថា រួចរាល់នៅរង្វង់ ឆមាសទី ២ ឆ្នាំ ២០២៧។ 

សូមជម្រាបជូនថា ស្ពានឆ្លងទន្លេបាសាក់នេះ នឹងក្លាយជាសមិទ្ធផលស្ពានឆ្លងកាត់ទន្លេទី ៨ នៅរាជធានីភ្នំពេញ បន្ថែមពីលើស្ពានទាំង ៧ ដែលកំពុងដំណើរការបច្ចុប្បន្នរួមមាន ស្ពានមិត្តភាពកម្ពុជា-ជប៉ុន ជ្រោយចង្វារ, ស្ពានមិត្តភាពកម្ពុជា-ចិន ជ្រោយចង្វារ, ស្ពានព្រះមុនីវង្ស ច្បារអំពៅ (ទី១), ស្ពានព្រះមុនីវង្ស ច្បារអំពៅ (ទី២), ស្ពានព្រែកព្នៅ មហាវិថី ឈ្នះ ឈ្នះ, ស្ពានបេតុងខ្សែកាប ឆ្លងទន្លេសាប ប្ញស្សីកែវ, និង ស្ពានបេតុងខ្សែកាប តភ្ជាប់តំបន់អភិវឌ្ឍន៍កោះនរា និងតំបន់អភិវឌ្ឍន៍កោះពេជ្រ ដែលទើបតែបើកឲ្យប្រើប្រាស់ថ្មីៗ។ 

ឆ្លៀតក្នុងឱកាសនេះ សម្តេចមហាបវរធិបតី ក៏បានថ្លែងអំណរគុណ និងស្នើដល់រដ្ឋាភិបាលចិន ព្រមទាំងក្រុមហ៊ុនវិនិយោគចិនឲ្យជួយបន្ដបណ្តាក់ទុនវិនិយោគលើគម្រោងសាងសង់ហេដ្ឋារចនាសម្ព័ន្ធ នៅកម្ពុជាបន្ថែមទៀត ដូចជា គម្រោងផ្លូវល្បឿនលឿន, គម្រោងផ្លូវនាវាចរណ៍ព្រែកជីកតេជោ-ហ្វូណន, គម្រោងផ្លូវរថភ្លើងធន់ស្រាល, រថភ្លើងក្រោមដីទាំងនៅរាជធានីភ្នំពេញ និងខេត្តសៀមរាប ព្រមទាំងគម្រោងផ្សេងៗទៀត ដើម្បីបម្រើដល់ការដឹកជញ្ជូនទូទាំងប្រទេស និងភ្ជាប់ទៅបណ្ដាប្រទេសជិតខាង សម្រួលដំណើរការសេដ្ឋកិច្ច ជម្រុញការលូតលាស់រីកចម្រើនទាំងអស់គ្នាទៅថ្ងៃមុខផងដែរ។ 

អត្ថបទ៖ Andra 
ប្រភព៖ ក្រសួងសាធារណការ និងដឹកជញ្ជូន

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!